कर वसुलीत वाकड अव्वल;
पालिकेच्या तिजोरीत ४१२.९७ कोटींची भर
मालमत्ता करसवलतींचा लाभ घेण्यास शेवटचे काही दिवस
पिंपरी, (हिंदवी न्यूज)l- पिंपरी चिंचवड महानगरपालिकेच्या कर आकारणी व कर संकलन विभागाने आर्थिक वर्ष २०२६-२७ मध्ये मालमत्ता कर संकलनात ४१२ कोटी रुपयांचा टप्पा पार केला आहे. दि. १ एप्रिल २०२६ ते २२ जून २०२६ या कालावधीत ३ लाख ६५ हजारांहून अधिक मालमत्ताधारकांनी जवळपास ४१२ कोटी ९७ लाख रुपयांचा मालमत्ता कर भरला असून, कर संकलनात सातत्याने वाढ होत आहे. महापालिकेच्या १८ क्षेत्रीय कार्यालयांपैकी वाकड विभागाने सर्वाधिक ५६.३९ कोटी मालमत्ता कर संकलित केला आहे. तसेच, त्याखालोखाल थेरगाव विभागाने ३७.३६ कोटी, कस्पटे वस्ती विभागाने ३२.९१ कोटी, किवळे विभागाने ३०.३८ कोटी मालमत्ता कर संकलित केला आहे.
याचबरोबर मालमत्ता कराच्या सामान्य करावर विविध प्रकारच्या सवलतींचा लाभ घेण्यासाठी आता केवळ काही दिवस शिल्लक राहिले आहेत. सवलतींची अंतिम मुदत ३० जून २०२६ असून नागरिकांनी शेवटच्या दिवसाची वाट न पाहता त्वरित मालमत्ता कर भरून उपलब्ध सवलतींचा लाभ घ्यावा, असे आवाहन महापालिकेच्या कर आकारणी व कर संकलन विभागाने केले आहे.
महापालिकेकडून आर्थिक वर्ष २०२६-२७ साठी ऑनलाइन पद्धतीने मालमत्ता कर भरणाऱ्या मालमत्ताधारकांना सामान्य करावर १० टक्के सवलत देण्यात येत आहे. या सवलतीला नागरिकांचा उत्स्फूर्त प्रतिसाद मिळत असून दि. १ एप्रिल २०२६ ते २२ जून २०२६ या कालावधीत ३ लाखांहून अधिक मालमत्ताधारकांनी ऑनलाइन पद्धतीने मालमत्ता कर भरून १० टक्के सवलतीचा लाभ घेऊन ३५८ कोंटींचा ऑनलाईन भरणा केला आहे. नागरिकांच्या सोयीसाठी महापालिकेच्या सर्व विभागीय कार्यालयांमधील मालमत्ता कर काउंटर शनिवार व रविवारदेखील सुरू ठेवण्यात आले आहेत. त्यामुळे नागरिकांना सुट्टीच्या दिवशीही आपल्या जवळच्या विभागीय कार्यालयात जाऊन मालमत्ता कर भरता येणार आहे.
—
क्षेत्रीय कार्यालयांनुसार वसुली
१. वाकड – ५६.३९ कोटी
२. थेरगाव – ३७.६६ कोटी
३. कस्पटे वस्ती – ३२.९१ कोटी
४. किवळे – ३०.३८ कोटी
५. चिखली – २९.८१ कोटी
६. चिंचवड – २७.६२ कोटी
७. भोसरी – २५.६८ कोटी
८. पिंपरी-वाघेरे – २५.४० कोटी
९. मनपा भवन – २४.०३ कोटी
१०. मोशी – २३.६६ कोटी
११. सांगवी – २१.९२ कोटी
१२. आकुर्डी – १६.७३ कोटी
१३. फुगेवाडी-दापोडी – १४.३६ कोटी
१४. चऱ्होली – १४.११ कोटी
१५. निगडी प्राधिकरण – १०.४४ कोटी
१६. दिघी-बोपखेल – ९.६९ कोटी
१७. तळवडे – ९.२८ कोटी
१८. पिंपरी नगर – २.८१ कोटी
*एकूण कर संकलन– ४१२.९७ कोटी रुपये
🗣💬पिंपरी चिंचवड शहराच्या विकासात प्रत्येक करदात्याचे योगदान महत्त्वाचे आहे. नागरिकांनी वेळेत मालमत्ता कर भरल्यामुळे रस्ते, पाणीपुरवठा, स्वच्छता, आरोग्य आणि इतर नागरी सुविधा अधिक सक्षमपणे उपलब्ध करून देता येतात. महापालिकेने विविध सवलती उपलब्ध करून दिल्या असून, नागरिकांनी ३० जून २०२६ पूर्वी कर भरून या सवलतींचा लाभ घ्यावा.
– रवि लांडगे, महापौर, पिंपरी चिंचवड महापालिका
🗣💬मालमत्ता कर हा महापालिकेच्या महसुलाचा प्रमुख स्रोत आहे. शहरातील पायाभूत सुविधांच्या उभारणीसह विविध विकासकामांसाठी या निधीचा उपयोग केला जातो. ऑनलाइन कर भरणाऱ्यांसाठी १० टक्के सवलत तसेच इतर विविध सवलती उपलब्ध आहेत. नागरिकांनी अंतिम मुदतीची वाट न पाहता त्वरित कर भरणा करून सवलतींचा लाभ घ्यावा.
– डॉ. विजय सूर्यवंशी, आयुक्त, पिंपरी चिंचवड महापालिका
🗣💬नागरिकांच्या सोयीसाठी महापालिकेच्या विभागीय कार्यालयांमध्ये शनिवार व रविवारदेखील मालमत्ता कर भरण्याची सुविधा उपलब्ध करून देण्यात आली आहे. शेवटच्या दिवसांतील गर्दी टाळण्यासाठी नागरिकांनी जवळच्या विभागीय कार्यालयात किंवा ऑनलाइन माध्यमातून मालमत्ता कर भरावा. वेळेत कर भरणे हे जबाबदार नागरिकत्वाचे प्रतीक असून, त्यातून शहर विकासालाही चालना मिळते.
-तृप्ती सांडभोर, अतिरिक्त आयुक्त, पिंपरी चिंचवड महापालिका
