हिंदवी न्यूज | पिंपरी
पिंपरी-चिंचवड शहरातील वाढती लोकसंख्या, झपाट्याने होणारे शहरीकरण आणि भविष्यात उद्भवू शकणारी पाणीटंचाई लक्षात घेता महापालिका प्रशासनाने आतापासूनच प्रतिबंधात्मक उपाययोजना कराव्यात, तसेच प्रभावी पाणी व्यवस्थापनासाठी ठोस नियोजन करावे, अशी मागणी पिंपरी-चिंचवड महापालिकेचे विरोधी पक्षनेते भाऊसाहेब सोपानराव भोईर यांनी केली आहे.
यासंदर्भात त्यांनी महापालिका आयुक्तांना निवेदन दिले आहे. त्यात संभाव्य पाणीटंचाईचे संकट टाळण्यासाठी पाणीगळती रोखणे, पिण्याच्या पाण्याचा अपव्यय थांबवणे, विहिरी व बोअरवेलचे योग्य व्यवस्थापन आणि स्वतंत्र पाणी व्यवस्थापन समिती स्थापन करण्यासह विविध उपाययोजना करण्यात याव्या अशी मागणी केली आहे.
शहराची लोकसंख्या सुमारे ३० लाखांवर गेली असून वाढत्या लोकसंख्येमुळे पाण्याची मागणीही मोठ्या प्रमाणात वाढत आहे. ऑक्टोबर आणि दिवाळीनंतरच्या काळात दुष्काळसदृश परिस्थिती निर्माण होऊन पाण्याची कमतरता जाणवण्याची शक्यता आहे. त्यामुळे संभाव्य संकटाची पूर्वकल्पना घेऊन प्रशासनाने आतापासूनच कठोर आणि नियोजनबद्ध पावले उचलणे आवश्यक असल्याचे भाऊसाहेब भोईर म्हणाले.
पाणीगळती रोखण्यासाठी फिरते दुरुस्ती पथक
शहरातील घरे, व्यावसायिक इमारती आणि कार्यालयांमध्ये नळ तसेच पाइपलाइनमधून होणारी पाणीगळती रोखण्यासाठी महापालिकेने स्वतंत्र फिरते दुरुस्ती पथक (मोबाइल टास्क फोर्स) स्थापन करावे. नागरिकांच्या मागणीनुसार नाममात्र शुल्कात किंवा मोफत गळती दुरुस्त करून देण्याची सुविधा उपलब्ध करून द्यावी. यामुळे मोठ्या प्रमाणात होणारा पाण्याचा अपव्यय टाळता येईल, अशी सूचना त्यांनी केली आहे.
वाहन धुण्यासाठी पिण्याच्या पाण्याच्या वापरावर बंदीची मागणी
पिण्याच्या पाण्याचा अनावश्यक वापर रोखण्यासाठी कार, दुचाकी यांसारखी वाहने पिण्याच्या पाण्याने धुण्यास बंदी घालावी. वाहनांची स्वच्छता ओल्या फडक्याने करावी, तसेच घरासमोरील अंगण, फरशी आणि पटांगण पाण्याने धुण्याऐवजी पुसून स्वच्छ करण्याचे नियम लागू करावेत. या नियमांचे उल्लंघन करणाऱ्यांवर जागेवरच किमान एक हजार रुपयांचा दंड आकारावा, अशी मागणीही त्यांनी केली आहे.
मोठ्या बांधकामांवर मर्यादा; विहिरी-बोअरवेलच्या व्यवस्थापनाची सूचना
पाण्याची उपलब्धता आणि संभाव्य तुटवडा लक्षात घेऊन शहरातील नवीन मोठ्या बांधकामांच्या पाणी वापरावर तात्पुरती मर्यादा किंवा स्थगिती आणण्याचा विचार करावा. तसेच शहरातील सार्वजनिक आणि खासगी विहिरी व बोअरवेल यांचे व्यवस्थापन महापालिकेने आपल्या नियंत्रणाखाली घेऊन उपलब्ध पाण्याचे योग्य वितरण करण्यासाठी सक्षम यंत्रणा उभारावी, असे त्यांनी सुचवले आहे.
गरजूंसाठी झुणका-भाकर केंद्र सुरू करण्याची मागणी
पाणीटंचाईच्या काळात आर्थिकदृष्ट्या दुर्बल आणि कष्टकरी नागरिकांना अन्नधान्य व भोजनाची समस्या भेडसावू नये, यासाठी सेवाभावी संस्थांना आर्थिक तसेच पायाभूत सुविधा उपलब्ध करून द्याव्यात. त्यांच्या माध्यमातून शहरात माफक दरात भोजन उपलब्ध करून देणारी झुणका-भाकर किंवा तत्सम अन्नछत्र केंद्र सुरू करावीत, अशी सूचना भोईर यांनी केली आहे.
पाणी व्यवस्थापन समिती स्थापन करून दर पंधरा दिवसांनी आढावा
शहरातील पाणीपुरवठ्याचे नियोजन, उपलब्ध पाण्याचा साठा, वितरण आणि संभाव्य अडचणी यावर देखरेख ठेवण्यासाठी विशेष पाणी व्यवस्थापन समिती गठित करावी. या समितीची दर पंधरा दिवसांनी बैठक घेऊन परिस्थितीचा आढावा घ्यावा आणि आवश्यक निर्णय तातडीने घ्यावेत.
नागरिकांमध्ये पाणी बचतीबाबत जनजागृती करण्याचे आवाहन
पाणी बचतीसाठी नागरिकांमध्ये व्यापक जनजागृती मोहीम राबवावी. घरातील फ्लश टँकचा अनावश्यक वापर टाळणे, शॉवरऐवजी बादलीतील मोजक्या पाण्याने स्नान करणे, तसेच भांडी धुतल्यानंतर उरलेल्या वापरलेल्या पाण्याचा (ग्रे वॉटर) झाडे आणि बागांसाठी पुनर्वापर करणे याबाबत नागरिकांना मार्गदर्शन करावे. याशिवाय पाणीटंचाईचा सामना करण्यासाठी नागरिकांकडूनही व्यावहारिक आणि उपयुक्त सूचना मागवाव्यात.
विरोधी पक्षनेता म्हणून नव्हे, तर एक सजग नागरिक म्हणून भविष्यातील संभाव्य पाणीटंचाईची जाणीव आणि नागरिकांच्या हिताची तळमळ यातून या सूचना मांडत असल्याचे भाऊसाहेब सोपान भोईर यांनी स्पष्ट केले. महापालिका प्रशासनाने या विषयाला सर्वोच्च प्राधान्य देऊन सूचनांची अंमलबजावणी करावी आणि संभाव्य पाणीटंचाईच्या संकटात नागरिकांना दिलासा द्यावा, असे आवाहन त्यांनी केले आहे.
