हिंदवी न्यूज | पिंपरी
एमपीएससी पेपरफुटीची चौकशीसह सहा मागण्यांसाठी संभाजी ब्रिगेडच्या वतीने संभाजी ब्रिगेडचे अध्यक्ष ॲड. मनोज आखरे व महासचिव सौरभ खेडेकर यांच्या मार्गदर्शनाखाली शहराध्यक्ष प्रवीण कदम यांच्या नेतृत्वात तहसीलदारांमार्फत मुख्यमंत्री देवेंद्र फडणवीस यांना निवेदन देण्यात आले.
निवेदनाद्वारे संभाजी ब्रिगेडने पुढील प्रमुख मागण्या केल्या आहेत. एमपीएससी औषध निरीक्षक भरती परीक्षेतील कथित पेपरफुटीची सखोल चौकशी करून दोषींवर कठोर कारवाई करावी.एमएचटी-सीईटी परीक्षा घोटाळ्याची चौकशी करून पर्सेंटाईल पद्धत रद्द करावी.सर्व स्पर्धा परीक्षा ऑनलाइनऐवजी ऑफलाइन पद्धतीने घ्याव्यात. टीईटी परीक्षा कायमस्वरूपी रद्द करावी.केजी ते पीजी पर्यंतचे शिक्षण सक्तीचे व मोफत करावे.यूपीएससीला बगल देणारी लॅटरल एन्ट्री प्रक्रिया तात्काळ बंद करावी.तसेच एनसीईआरटीच्या पाठ्यपुस्तकात राजा छत्रपती शिवाजी महाराजांचा इतिहास व मराठा साम्राज्याचा नकाशा पूर्ववत समाविष्ट करावा.
सरकारने विद्यार्थी, शिक्षक व पालकांच्या हिताचा विचार करून या मागण्यांवर तातडीने निर्णय घ्यावा, अन्यथा तीव्र आंदोलन छेडण्यात येईल, असा इशारा संभाजी ब्रिगेडने दिला. यावेळी संभाजी ब्रिगेडचे उपनेते सतीश काळे, पिंपरी चिंचवड शहराध्यक्ष प्रवीण कदम, कार्याध्यक्ष वैभव जाधव, उपाध्यक्ष नारायण बिरादार,वैभव गजधने, कोषाध्यक्ष राजेश सातपुते,संघटक परशुराम रोडे, विवेक गायकवाड, शाम पाटील तसेच अन्य पदाधिकारी व कार्यकर्ते उपस्थित होते.
