हिंदवी न्यूज | आळंदी
भीमाशंकरच्या समृद्ध व जैवविविधतेने नटलेल्या जंगल क्षेत्रात तब्बल ६०० एकर जमीन अधिग्रहित करून तिथे विद्युत प्रकल्प उभारण्याच्या हालचालींना तीव्र विरोध सुरू झाला आहे. या प्रकल्पाविरोधात ग्रामस्थ आणि सर्व तालुक्यातील नागरिकांनी आक्रमक भूमिका घेतली असून, अखिल भारत हिंदू महासभेचे राष्ट्रीय अध्यक्ष वैभवराज रौंदळ यांनी स्थानिकांच्या या लढ्याला जाहीर पाठिंबा दर्शविला आहे.
यासंदर्भात वैभवराज रौंदळ यांनी भारताचे पंतप्रधान, केंद्रीय पर्यावरण व हवामान बदल मंत्री तसेच महाराष्ट्राचे मुख्यमंत्री यांना थेट निवेदन पाठवून हा प्रकल्प तात्काळ रद्द करण्याची आणि दुसरीकडे स्थलांतरित करण्याची ठाम मागणी केली आहे.
भीमाशंकरचे पर्यावरण व जैवविविधता धोक्यात
सह्याद्रीच्या पर्वत रांगांमधील भीमाशंकरचे जंगल हे केवळ एक निसर्गरम्य ठिकाण नसून ती एक मोठी जैविक परिसंस्था) आहे. या जंगलात दुर्मिळ प्राणी, पक्षी आणि विविध प्रकारच्या औषधी वनस्पती मोठ्या प्रमाणावर आढळतात. हा संपूर्ण परिसर महाराष्ट्राचा नैसर्गिक आणि सांस्कृतिक वारसा जपण्याचे काम करतो.
वैभवराज रौंदळ यांनी आपल्या पत्रात नमूद केले की, “येथे ६०० एकर जंगल तोडून विद्युत कंपनी उभारल्यास मोठ्या प्रमाणात खोदकाम आणि वृक्षतोड होईल. यामुळे निसर्गाचा समतोल पूर्णपणे बिघडून पर्यावरणाचा प्रचंड ऱ्हास होईल. निसर्गाची ही हानी कधीही भरून न निघणारी आहे.”
स्थानिक जनतेच्या भावनेचा आदर करा
भीमाशंकर परिसरातील सर्व गावे आणि तालुक्यांमधील जनतेचा या प्रकल्पाला पूर्ण विरोध आहे. “स्थानिक नागरिकांना जर हा प्रकल्प त्यांच्या भागात नको असेल, तर प्रशासनाने जबरदस्ती करू नये. जनतेच्या विरोधाची दखल घेऊन आम्ही स्थानिकांच्या पाठीशी खंबीरपणे उभे आहोत,” असे रौंदळ यांनी स्पष्ट केले.
प्रकल्प वाळवंटी किंवा पडीक जागेत हलवण्याची मागणी
महाराष्ट्र ही गड-किल्ले, संस्कृती आणि समृद्ध सह्याद्री रांगांची भूमी आहे. हा नैसर्गिक वारसा जसाच्या तसाच राहिला पाहिजे. त्यामुळे अशा हरित पट्ट्यात प्रकल्प उभारण्याऐवजी शासनाने तो एखाद्या पडीक किंवा वाळवंटी जागेत स्थापित करावा. यामुळे देशाचा विकासही होईल आणि पर्यावरणाचे रक्षणही होईल, असा पर्याय त्यांनी सुचवला आहे.
🗣💬”सह्याद्रीच्या कुशीतील निसर्ग, पर्यावरण आणि जीवसृष्टी वाचवणे हे आपले आद्य कर्तव्य आहे. त्यामुळे प्रशासनाने भीमाशंकर येथील प्रस्तावित विद्युत प्रकल्प तात्काळ रद्द करावा.”
— वैभवराज रौंदळ ,राष्ट्रीय अध्यक्ष, अखिल भारत हिंदू महासभा
