स्वायत्ततेमुळे विद्यार्थ्यांच्या सर्वांगीण विकास व गुणवत्तापूर्ण शिक्षणाला प्रोत्साहन – प्रा. डॉ. संजय बी. चोरडिया यांचे प्रतिपादन;
हिंदवी न्यूज | पुणे
सावित्रीबाई फुले पुणे विद्यापीठाशी संलग्न असलेल्या सूर्यदत्त इन्स्टिट्यूट ऑफ मॅनेजमेंट अँड मास कम्युनिकेशन (SIMMC) या अग्रगण्य संस्थेला विद्यापीठ अनुदान आयोग (UGC) कडून स्वायत्त (Autonomous) दर्जा प्रदान करण्यात आला आहे. विद्यापीठ अनुदान आयोग, नवी दिल्ली यांच्या पत्र क्र. F.2-10/2023 (AC-Policy), २०२६ अन्वये हा दर्जा मंजूर करण्यात आला असून, संस्थेच्या शैक्षणिक उत्कृष्टता, नवोपक्रम, संशोधन आणि जागतिक दर्जाच्या शिक्षणाच्या दिशेने वाटचालीतील हा एक ऐतिहासिक टप्पा मानला जात आहे.
SIMMC मध्ये MBA, MCA, BBA आणि BCA हे अभ्यासक्रम उपलब्ध असून, उद्योगाभिमुख कौशल्ये, नेतृत्वगुण, संशोधनवृत्ती आणि मूल्याधिष्ठित शिक्षणाच्या माध्यमातून भविष्यातील सक्षम व्यावसायिक घडविण्यावर संस्थेचा भर आहे. AICTE मान्यता आणि NAAC कडून ‘A’ ग्रेड प्राप्त असलेल्या SIMMC ने शैक्षणिक गुणवत्ता, संशोधन, उद्योग-संलग्नता, नवोपक्रम आणि विद्यार्थ्यांच्या सर्वांगीण विकासामध्ये सातत्यपूर्ण उत्कृष्ट कामगिरी केली आहे.
स्वायत्त दर्जामुळे संस्थेला अभ्यासक्रमांची रचना, मूल्यमापन पद्धती, उद्योगाभिमुख विषयांचा समावेश, संशोधनाला चालना तसेच नवोपक्रमशील शैक्षणिक उपक्रम राबविण्याचे अधिक स्वातंत्र्य मिळणार आहे. बदलत्या जागतिक आणि डिजिटल युगाशी सुसंगत अभ्यासक्रम विकसित करताना कौशल्याधारित शिक्षण, लवचिक मूल्यमापन, लाइव्ह प्रोजेक्ट्स, उद्योगाभिमुख इंटर्नशिप, आंतरराष्ट्रीय सहकार्य आणि अनुभवाधारित शिक्षणावर अधिक भर दिला जाणार आहे.
स्वायत्ततेमुळे SIMMC ला जागतिक उद्योगक्षेत्रातील बदलत्या गरजा आणि भविष्यातील रोजगाराच्या संधी लक्षात घेऊन अत्याधुनिक व उद्योगाभिमुख ऐच्छिक (Elective) अभ्यासक्रम सुरू करण्याचे स्वातंत्र्य मिळाले आहे. याअंतर्गत विद्यार्थ्यांना कृत्रिम बुद्धिमत्ता (AI) आणि जनरेटिव्ह AI, सोशल मीडिया व डिजिटल जाहिरात, इन्फ्लुएंसर व कंटेंट क्रिएटर मार्केटिंग, ग्राहकांच्या ऑनलाइन वर्तनाचा अभ्यास, ग्राहकांच्या आवडी-निवडी समजून घेऊन मार्केटिंग करण्याच्या पद्धती, ऑनलाइन खरेदी-विक्री आणि डिजिटल व्यवसाय व्यवस्थापन, आर्थिक अहवाल समजून घेणे व कंपन्यांच्या आर्थिक स्थितीचे विश्लेषण, पर्यावरणपूरक व जबाबदार व्यवसाय आणि गुंतवणूक, व्यक्तिमत्त्व व क्षमता ओळखण्यासाठी मानसशास्त्रीय चाचण्या, नेतृत्वगुण व भविष्यातील नेतृत्वाची तयारी, व्यवसायातील जोखीम ओळखून त्याचे विश्लेषण, सोशल मीडिया आणि वेबसाइटच्या कामगिरीचे विश्लेषण, क्लाउड तंत्रज्ञानाच्या माध्यमातून डेटाचे विश्लेषण, शेतीमध्ये डिजिटल तंत्रज्ञानाचा वापर, कृषी व्यवसाय व धोरणे, ऑनलाइन ग्राहकांशी संबंध व्यवस्थापन, ऑनलाइन पार्टनरच्या माध्यमातून विक्री वाढविण्याच्या पद्धती, ई-कॉमर्स व ऑनलाइन मार्केटप्लेसचे व्यवस्थापन तसेच व्हिडिओ मार्केटिंग आणि YouTube चॅनेलची प्रभावी रणनीती अशा भविष्योन्मुख विषयांचा अभ्यास करण्याची संधी मिळू शकेल.
या अभ्यासक्रमांमुळे विद्यार्थ्यांना नवीन तंत्रज्ञानाचा वापर, डिजिटल व्यवसाय, डेटाच्या आधारे योग्य निर्णय घेणे, ग्राहकांना समजून घेणे, आर्थिक नियोजन, शाश्वत व्यवसाय, नेतृत्व, नवकल्पना आणि उद्योजकता यांचा प्रत्यक्ष व व्यावहारिक अनुभव मिळेल. त्यामुळे विद्यार्थ्यांची तंत्रज्ञानाधारित कौशल्ये, उद्योगाच्या गरजांनुसार काम करण्याची क्षमता, सर्जनशील विचारसरणी आणि देश-विदेशातील रोजगाराच्या संधींसाठी आवश्यक कौशल्ये अधिक सक्षम होऊ शकतील.
यासोबतच संशोधन, नवोपक्रम, स्टार्टअप संस्कृती आणि उद्योजकतेला चालना देत विद्यार्थ्यांना ‘Job Ready’, ‘Future Ready’ आणि ‘Global Ready’ बनविण्यासाठी संस्था अधिक प्रभावीपणे कार्य करणार आहे. उद्योग, संशोधन संस्था व आंतरराष्ट्रीय विद्यापीठांशी अधिक परिणामकारक शैक्षणिक सहकार्य प्रस्थापित करून विद्यार्थ्यांना लाइव्ह प्रोजेक्ट्स, उद्योगाभिमुख प्रशिक्षण, इंटर्नशिप, संशोधन संधी आणि जागतिक दर्जाचे शिक्षण अनुभव उपलब्ध करून देण्यावर विशेष भर दिला जाणार आहे.
या उल्लेखनीय यशाबद्दल सूर्यदत्त एज्युकेशन फाउंडेशनचे संस्थापक अध्यक्ष प्रा. डॉ. संजय बी. चोरडिया म्हणाले, “SIMMC ला मिळालेला स्वायत्त दर्जा हा संस्थेच्या सातत्यपूर्ण गुणवत्तापूर्ण प्रयत्नांचा सन्मान आहे. या स्वायत्ततेमुळे विद्यार्थ्यांना उद्योगाच्या बदलत्या गरजांनुसार अधिक अद्ययावत आणि कौशल्याधारित शिक्षण देण्याची संधी मिळणार आहे. विद्यार्थ्यांना भविष्यासाठी सक्षम करण्यासाठी आम्ही सातत्याने प्रयत्नशील राहू.”
ते पुढे म्हणाले, “शिक्षणाची गुणवत्ता सातत्याने उंचावणे, संशोधनाला चालना देणे, उद्योगांशी अधिक भक्कम संबंध निर्माण करणे, जागतिक स्तरावरील शैक्षणिक सहकार्य वाढविणे आणि विद्यार्थ्यांना आंतरराष्ट्रीय संधी उपलब्ध करून देणे हेच आमचे ध्येय राहील. स्वायत्त दर्जा आम्हाला अधिक नाविन्यपूर्ण आणि परिणामकारक शैक्षणिक उपक्रम राबविण्यास प्रेरणा देणारा ठरेल.”
गेल्या काही वर्षांत SIMMC ने अनुभवाधारित शिक्षण, उद्योग-संलग्न उपक्रम, आंतरराष्ट्रीय शैक्षणिक सहकार्य, संशोधन, राष्ट्रीय व आंतरराष्ट्रीय परिषदांचे आयोजन, स्टार्टअप्स व उद्योजकतेला प्रोत्साहन, कौशल्यविकास उपक्रम तसेच विद्यार्थ्यांच्या सर्वांगीण व्यक्तिमत्त्व विकासासाठी विविध अभिनव उपक्रम राबवून राज्य आणि राष्ट्रीय स्तरावर आपली वेगळी ओळख निर्माण केली आहे.
या ऐतिहासिक यशाबद्दल सूर्यदत्त एज्युकेशन फाउंडेशनच्या उपाध्यक्षा व सचिव सौ. सुषमा संजय चोरडिया म्हणाल्या, “SIMMC ला मिळालेला स्वायत्त दर्जा हा केवळ सन्मान नसून सूर्यदत्त परिवाराच्या समर्पण, गुणवत्ता आणि सातत्यपूर्ण उत्कृष्टतेची दखल आहे. या यशात योगदान देणाऱ्या प्रत्येक प्राध्यापक, कर्मचारी, विद्यार्थी, माजी विद्यार्थी आणि पालकांचे मी मनःपूर्वक अभिनंदन करते. या नव्या जबाबदारी सह गुणवत्तापूर्ण, कौशल्याधारित आणि जागतिक दर्जाचे शिक्षण देत आपण उत्कृष्टतेची नवी उंची गाठू, असा मला विश्वास आहे.”
SIMMC ला प्राप्त झालेला स्वायत्त दर्जा हा संस्थेसाठी व उच्च शिक्षण क्षेत्रासाठीही महत्त्वाचा टप्पा असून विद्यार्थ्यांच्या शैक्षणिक, व्यावसायिक, संशोधनात्मक आणि उद्योजकीय प्रगतीस नवी दिशा देणारा ठरणार आहे. गुणवत्तापूर्ण शिक्षण, उद्योगसुसंगत अभ्यासक्रम, जागतिक दृष्टीकोन व नवोपक्रम यांच्या बळावर SIMMC आगामी काळात राष्ट्रीय व आंतरराष्ट्रीय स्तरावर अधिक प्रभावी स्थान निर्माण करेल, असा विश्वास संस्थेच्या व्यवस्थापनाने व्यक्त केला.
