हिंदवी न्यूज | पिंपरी
आज शिक्षणविश्वावर शोककळा पसरली आहे. एक युग संपले आहे. ज्ञान, संस्कार, दूरदृष्टी आणि मानवतेचा अखंड दीप प्रज्वलित ठेवणारे एक थोर शिक्षणमहर्षी माजी राज्यपाल डॉ. डी. वाय. पाटील समूहाचे संस्थापक पद्मश्री डॉ. डी. वाय. पाटील (दादा) वयाच्या ९१ व्या वर्षी मंगळवारी (दि. ४ ऑगस्ट) सकाळी ११ वा. अनंतात विलीन झाले.
पद्मश्री डॉ. डी. वाय. पाटील यांनी केवळ शैक्षणिक संस्था उभारल्या नाहीत, तर असंख्य विद्यार्थ्यांची स्वप्ने घडवली, मूल्यांची जोपासना केली आणि शिक्षणाला समाजपरिवर्तनाचे प्रभावी माध्यम बनविले. त्यांचे दूरदर्शी नेतृत्व, साधेपणा, मानवतावादी दृष्टिकोन व शिक्षणाप्रती असलेली अखंड निष्ठा भावी पिढ्यांसाठी सदैव प्रेरणादायी राहील.
पद्मश्री डॉ. डी. वाय. पाटील यांचे अंत्यदर्शन आणि अंत्यसंस्कार बुधवार दि. ५ ऑगस्ट २०२६ ला कोल्हापूर येथे होईल.
अंत्यदर्शन : सकाळी ९ ते सायंकाळी ४ वाजता, यशवंत निवास, कसबा बावडा, कोल्हापूर
अंत्ययात्रा : सायंकाळी ४ वाजता, निवास स्थानापासून
अंत्यसंस्कार : सायंकाळी ५ वा. डी. वाय. पाटील, मेडिकल कॉलेज विद्यापीठ परिसर, लाईन बाजार, कसबा बावडा कोल्हापूर येथे होत आहे
थोर समाजसेवक, दूरदृष्टीचे शिक्षणतज्ञ आणि प्रेरणादायी व्यक्तिमत्वाला विनंम्र अभिवादन
“पद्मश्री डॉ. डी वाय पाटील दादा यांचे निधन हा आमच्या कुटुंबावर आणि व्यक्तिशः माझ्यावर आघात आहे. डी.वाय. दादांनी शिक्षण हेच आपले जीवनकर्तव्य मानले होते. कै. वसंतदादा पाटील यांनी उच्चशिक्षणाच्या संधी सर्वसामान्यांच्या मुलांना मिळाव्या यासाठी ऐंशीच्या दशकात विनाअनुदानित शिक्षणसंस्था सुरू करण्यात प्रोत्साहन दिले. त्यांच्या हाकेला ‘ओ’ देणाऱ्या प्रमुख शिलेदारांमध्ये डीवाय दादांचा समावेश होता. जीवनाच्या सर्व क्षेत्रांना व्यापून टाकणाऱ्या विषयांचे शिक्षण देण्याच्या सुविधा डॉ डी. वाय. पाटील यांनी संस्थांच्या माध्यमातून उपलब्ध करुन दिल्या. आज केवळ भारतात नव्हे तर जगभर आमच्या संस्थांमधून शिकलेले हजारो विद्यार्थी कर्तृत्व गाजवत आहेत. आयुष्यात चांगला शिक्षणतज्ज्ञ म्हणून स्वतःची घडण करण्याचे निश्चित उद्दिष्ट डोळ्यांपुढे ठेवून दादांनी सक्रिय राजकारणाचा मोह टाळला. शिक्षण हे त्यांचा ध्यास होता. त्यांचा अखेरपर्यंतचा या क्षेत्रातला प्रवास भावी पिढ्यांना कदाचित दंतकथा वाटावा असाच आहे. ज्ञानचा समाज परिवर्तनासाठी उपयोग करण्याची त्यांची प्रेरणा केवळ आमच्या कुटुंबालाच नव्हे तर संपूर्ण समाजापुढे दीपस्तंभाप्रमाणे राहील.” ईश्वर त्यांच्या पवित्र आत्म्यास चिरशांती देवो
– डॉ. पी. डी. पाटील, कुलपती, डॉ. डी. वाय. पाटील विद्यापीठ, पिंपरी, पुणे*
